Xiriirka cusub ee Soomaaliya iyo Itoobiya-qaybta 2aad W/Q Xasan Yuusuf Waal

Xiriirka cusub ee Soomaaliya iyo Itoobiya-qaybta 2aad W/Q Xasan Yuusufwaal

Maahmaah Soomaaliyeed baa oranaysa “ waan baahanahay baqtiga looma cuno”.  Garwadeenka garanaya gar-adagta iyo gorgortanka siyaasadeed marnaba ma ogalaado, si kastoo uu u tabar daran yahay, in uu qaato qariir, quursi iwm.

Qarni ku dhawaad, waxa hoog iyo halaag la baday dadka Falastiiniyiinta, iyaga oo qaybsan ayaa haddana qaddiyada iyo arrimaha lama-taabtaanka  ee dadka reer Falastiin gar iyo gorgortan midna laga galin.

Heshiiskii dhawaan dhexmaray Soomaaliya iyo Itoobiya mar kale waa mid ay ka muuqato tanaasul badan oo dhanka Soomaalida ah iyo faa’iido badan oo xaga Itoobiyaanka ah. Ra’iisul-wasaare Axmed wuxuu ku guuleeystay wax Haylesalaase iyo Mingiste ku guuldareeysteen.

Anigoon gaarsiinayn heer in si toos ah Itoobiya la isugu dhiibay ayaan waxaan aamin sanahay in heshiiskaan si fudud ugu sharciyeeyay Itoobiya waxa dad badan oo inaga horeeyay ay diideen- in Soomaali marti ku noqoto geeska Afrika.

Sidda loo dhigayo uma sahlana. Sawirka is-gaashaanbuuraysiga dhaqan-dhaqaale iyo aragtidii Nagruuma iyo Qadaafi ee ahayd Afrika hal dal noqotay laguma dabaqi karo arinkaan cusub. Kow,  dawlada Soomaaliya oo awood dhan kastaba aan lahayn, dad keeduna qaybsan yihiin. Laba, Itoobiya oo faragilin toos ah, dhan walba ah, oo aan dhamaan ku haysa Soomaaliya iyo dhaxalkii dhibkii dhexmaray labada dal.

Markaan ogalaano isdhexgalka iyo dhaqaale wadaaga dad aan u aragno cadaw, kaa awood iyo agab badan maantay maxaad ku beddelanaysaa?  In Itoobiya xal u keento maamul goboleedyada dalka iyo Alshabaab, mise……Hagaag waxba kama qabo laakiin suurtagal matahay? Maya maxaa yeelay labada arimoodba waa aalad ay Itoobiya ku ilaashato danaheeda Soomaaliya.

Arinka ixtiraamka madax-banaanida Soomaaliya, Itoobiya waxay marar badan fagaare ka sheegtay in aysan dhib u geesanayn Soomaaliya. Wixii qaylo ahaa oo ka dhacay oo aad wada garanaysaan arinkii Qalbidhagax Itoobiya waxa ay isla soo sawirtay Axmed Madoobe iyo Qalbidhagax oo si qurxuun loogu soo labisay.

Waxaan soo tijaabinay marar badan oo hore  xalka dalkeena oo laga raadiyo dibada dawana lagama helin. Haddaba soo ma haboona in aynu keeno kasmo cusub oo ka duwan wixii hore. Weynu aragnaa oo arkeeyney sidda loogu kala baratamayo khayraadka dabiiciga ee dalkeena.

La yaab maleh in ay kulan sadaan dhismaha ciidanka badda Itoobiya iyo damaca dekedaha dalkeena. Siddoo kale la yaab maleh hadalkii ka soo yeeray Ra’iisul-wasaaraha Itoobiya oo uu yiri hal dal beeynu noqoneeynaa balse waxaa la yaab leh marka madaxdeenu ay u meel dayaan Istaraatiijiyada rasmiga ah ee Itoobiya ee ku aadan Soomaaliya---soo wax muuqaal-dhow ma’ahan!

Filo qayb kale…